Laçi pret Dutrën, Teko gati për…garë

● Kurbinasit e teknikut Sulejman Starova, nesër në Pezë- Helmës (16 30) për miqësore me Apoloninë pretendente të grupit B në Kategori të Parë.

Bardhezinjtë, ndryshe nga parashikimet, i kanë bërë një nisje jo të mirë edicionit të ri. Vetëm në ndeshjen e tretë, atë të barazuar me Kukësin 1-1, në ‘Loro Boriçi’, u shfaq një skuadër mjaft dinamike dhe e mirëvendosur në fushë.

Megjithatë, bardhezinjtë këto ditë presin të kompletohën totalisht dhe të nisin rrugëtimin drejt objektivave sezonalë. 

Me Xhixhën dhe Shehun të impenjuar me U-21, Starova po punon me pjesën tjetër, ndërkohë që pret lojtarin Stenio Garcia Dutra i cili me gjasë del në seancë sot pasdite.

Por tekniku i Laçit, ka dhe një futbollist prej të cilit pritet shumë por që ende nuk është aktivizuar.

Është Teldiano Guimaresh -Teko. Braziliani tjetër edhe pse stërvitet prej afro 2 muajve, nuk ka mundur të aktivizohet në tri takimet e para. 

Mesfushori i linjës, ka mbartur nga edicioni i kaluar dy ndeshje pezullim, ndërsa në Kukësi-Laçi, e la jashtë një virozë.

Nesër, Laçi në miqësore me fierakët, pritet të provojë disa lojtarë apo skema që  mund t’i sherbejnë për shtëpiakën me Partizanin.