Frederik Masara, drejtori i ri sportiv i Milanit
● Menaxheri do të bëhet pjesë e stafit drejtues të “kuqezinjve” nga 1 korriku 2019
Ekipi i drejtues i Milanit u plotësua. Ashtu siç pritej, klubi i “kuqezinjve” njoftoi se që nga 1 korriku 2019 Frederik Masara zyrtarisht do të jetë drejtori sportiv i ekipit të Milanit.
Masara do të raportojë direkt te drejtori teknik i zhvillimit strategjik të klubit, Paolo Maldini dhe do të bashkohet me Zvonimir Boban, të cilit i është besuar roli i zyrtarit kryesor të futbollit “kuqezi”.
“Ne jemi shumë të lumtur për të mirëpritur Frederikon në ekipin tonë të punës, – tha Paolo Maldini – Falë përgatitjes së tij, seriozitetit dhe profesionalizmit, ai do të jetë një vlerë e shtuar për Milanin dhe do të jetë funksional për strategjitë që do të ndërmerren në rrugën tonë të rritjes”.
Lajmin e bën të ditur vetë klubi i Milanit, i cili nëpërmjet një njoftimi, jep edhe CV-në e Frederik Masarës, lindur 51 vite më parë në Torino, teksa nga viti 2011 ai ka marrë licensën e drejtorit sportiv, detyrë që e ka kryer te Roma, por edhe në futbollin kinez së fundmi.
