AF Elbasani pret Bylis, e prapambetura si një…finale
Dueli i Elbasanit pritet të ndiqet nga një numër rekord tifozësh. Fitorja e vendasëve i shpall ‘kampionë Dimri’.
AF Elbasani-Bylis është supesfida e prapambetur e Kategorisë së Parë që do të zhvillohet këtë pasdite (18:00) në ‘Elbasan Arena’. Të dyja skuadrat vijnë në këtë duel me avantazhin e kryesimit të kësaj kategorie si vendi i parë Bylis (38) dhe vendi i dytë AF Elbasani (35).
Vendasit e Nevil Dedes në organikën e të cilit ka shumë futbollistë që vijnë nga Superiorja e kaluar, pritet të kenë mbështetje maksimale në tribuna pasi përgjatë gjithë kampionatit, fansat verdheblu, kanë spikatur më shumë se çdo tifozeri tjetër.
Në kahun tjetër ballshiotët e Arjan Bellait kanë zhvilluar 15 javë të shkëlqyera duke marrë humbjen e vetme vetën pak ditë më parë në Peshkopi me Korabin 2-1.
Ndërkaq pas kësaj ndeshjeje, Kategoria e Parë mbyll zyrtarisht ndeshjet e vitit kalendaik 2023 për t’u rikthyer me javën e 17-të në 20 janar 2024./Klevis Bejkolli/