Sfidë spektakolare, AF Elbasani e Bylis ndajnë pikët
Kategoria e Parë: E prapambetur/ AF Elbasani- Bylis 2-2 (Greca 26′, Telushi 71′ / Xheferson 57′, Kamara 64′)
AF Elbasani-Bylis, supersfida e prapambetur e Kategorisë së Parë u luajt dhe u mbyll mes spektaklit në fushë e tribuna këtë pasdite (18:00) në ‘Elbasan Arena’.
Të dyja skuadrat vinin në këtë duel me avantazhin e kryesimit të kësaj kategorie si vendi i parë Bylis (38) dhe vendi i dytë AF Elbasani (35).
Para afro 7 mijë tifozësh, dy skuadrat e kreut zhvilluan një ndeshje të nivelit superior duke treguar qetësi, maturi, gola dhe pakëz tension…
Fillimisht vendasit e Dedes shkojnë përpara me Grecën që shënon dhe golin e 10-të personal në të 26′. Me startin e së dytës, ballshiotët godasin dy herë me Xheferson 57′ dhe Kamara 64′.
Për të rivendosur barazimin mendoi veterani Telushi teksa në të 71′ i dërgoi shifrat në 2-2 final. Pas kësaj jave dy skuadrat ruajtën pozitat e para me mallkastriotët që shpallen ‘kampionë Dimri’. Kampionati inferior nis më 20 janar 2024. /Klevis Bejkolli- Sportiim.al/