Liverpul fiton Superkupën, Klop të gjithë trofetë
Superkupa e Anglisë; Liverpul- Siti 3-1 (Aleksandër Arnold 21′, Salah (pen) 83′ , Nunjez 90’+4′ / Alvarez 70′ )
Mes spektaklit, futbollit të bukur, rasteve të diskutueshme dhe brohorimave të tifozëve të panumërt në “King Power Stadium” (Lieçester), Liverpul fiton Superkupën e Anglisë përballë kampionëve në fuqi, Mançester Sitit.
Me shifrat 3-1 për ‘Reds’ përfundoi sfida e luftuar nga të dyja skuadrat. Një pjesë e parë shumë e mirë për Liverpulin, i cili u tregua cinik si në mbrojtje ashtu dhe në sulm duke arritur të shënojë me Arnold në minutën e 21′-të falë një aksioni të ndërtuar mjaft mirë dhe një finalizimi perfekt nga distanca.
Kampionët e Sitit shpërdorojnë shumë para porte me Haland që duket sikur ka harruar të shënojë.
Në pjesën e dytë, skuadra e Mançester Sitit do të reagojë më ndryshe dhe do të gjejë golin e barazimit në minutën e 70′-të me Alvarez. Në fillim gjithçka konsiderohet e parregullt por sistemi VAR i jep një dorë Sitit dhe “lejon” golin e baraspeshës.
Liverpul kalon sërish në avantazh me Salah që nuk gabon nga pika e bardhë e penalltive dhe në minutën e 83′-të dërgon topin në rrjetë.
Pasi akordohen 7 minuta shtesë, Liverpul vulos fitoren me golin e tretë dhe të fundit të realizuar nga prurja më e re Darvin Nunjez (94′).
Kështu, nënkampionët e Anglisë “hakmerren” ndaj atyre me të cilët luftuan sezonin e kaluar për kampionatin por në fund nuk ia dolën t’ia rrëmbenin. /Sara Gjidiaj/
Formacionet startuese: Liverpul-Manpester Siti.