Çelhaka: Jam gati, të fitojmë me krutanët
Mesfushori i kampionëve bardheblu Jurgen Çelhaka, ka lënë prapa dëmtimin që e ka mbajtur jashtë fushave për pjesën e parë të sezonit dhe nga sot, futet në planet e teknikut Nevil Dede.
Njëri prej lojtarëve më të rëndësishëm të ekipit që u shpall kampion (2019-20), njëherazi dhe zbulim i sezonit pati probleme me muskujt e barkut. Para ndeshjes me Kastriotin nesër në ‘Selman Stërmasi’ doli para gazetarëve për të folur për gjendjen e tij, por dhe të skuadrës.
Si është gjendja e Çelhakës?
“Gjendja ime është shumë e mirë, jam rikthyer pas një kohe të gjatë. Tani jam gati në 100%-in tim, vetëm kondicioni im fizik nuk është aty ku duhet. Shpresoj me stërvitje do të arrij aty ku duhet dhe nga java tjetër, kismet Zotit, do të vazhdojmë aty ku e kemi lënë. Ka qenë shumë e vështirë, nuk isha përballur asnjëherë me kështu dëmtimesh, por të gjithë çunat më kanë qëndruar afër, të gjithë drejtuesit më kanë qëndruar afër. Kjo më ka bërë që të mos e ndjej fare këtë dëmtim.”
Si të është dukur skuadra këto kohë që nuk ke luajtur?
“Skuadra ka bërë ndeshje shumë të mira, të gjithë çunat kanë dhënë 100%, vetëm çështja e golit nuk është zgjidhur shumë mirë. Besoj se Seferi dhe Muçi do e zgjidhin çështjen e golit.”
Të tremb konkurenca?
“Jo, konkurenca i bën mirë ekipit, i mirëpres të gjithë lojtarët e mirë. Toli ka bërë ndeshje të mira, edhe unë mund të bëj ndeshje të mira tani që kthehem. Mund të luaj me Tolin dhe Bathën, i takon trajnerit.”
Titulli?
“Mendoj se Tirana duhet të mendojë për ndeshjen e ardhshme. Edhe vjet kështu e nisëm dhe e përfunduam me titullin kampion. Ndaj Kastriotit është ndeshje e vështirë, ata janë agresivë, por ne jemi Tirana, luajmë në shtëpinë tonë dhe shkojmë vetëm për fitore”, Çelhaka.