Nikaj merr Burrelin, Vata largohet nga Erzeni
Samuel Nikaj eviton ofertat nga Kosova dhe disa skuadra të interesuara në Kategori të Parë dhe ndalet po në këtë nivel duke marrë drejtimin e Burrelit.
Nën shoqërinë e drejtorit të klubit matjan, Klevis Gjoka, tekniku shkodran nuk ka konfirmuar 100% angazhimin, por me gjasë tani pritet vetëm firma.
Më herët shkodrani ishte shumë pranë rikthimit te Vushtrria e rrëzuar këtë edicion nga Ipko. Nikaj pati deklaruar, se: “nëse kthehen drejtuesit e vjetër edhe unë do t’i bashkohem skuadrës.”
Sakaq, nga Erzeni largohet portieri Elton Vata. Klubi shijakas e ka zyrtarizuar në rrjete.
“Klubi Futbollit Erzeni njofton se portieri Elton Vata nuk është më pjesë e skuadrës sonë. Klubi i Erzenit e falenderon Vatën për kontributin e dhënë me skuadrën tonë dhe i uron suksese në të ardhmen”– shkruan klubi i Erzenit.
