Tirana nuk ka trajner për të… ikur
Tirana e kthyer në kantier. Këtë radhë përpos afrimeve ‘BIG’, janë strukturat e klubit më të titulluar në vënd, që kanë nisur me programe të qarta në të gjitha hallkat.
Afrimi i Devollit te U-19, por dhe ai i Ahmatajit në rolin e teknikut të U-17, kanë krijuar idenë se kryeqytetasit, po hedhin bazat e duhura për të ardhmen.
Është një padrejtësi e pashoqe nëse do ishte kështu, por klubi tregohet serioz dhe nuk lë vend për hamendësime, ndërsa zbardh situatën.
Në fakt, pas afrimit të Julian Ahmatajt, ndërsa u fol se do marrë një rol drejtuesi (Drejtor teknik), të shumtë ishin ata që nisën të aludojnë se elbasanasi, është afruar për të zevëndësuar Ardian Memën.
Në reagimin e klubit, sqarohet gjithçka.
“Julian Ahmataj është zyrtarisht pjesë e KF Tiranë në rolin e Scoutit dhe atë të trajnerit të ekipit U-17. Klubi ka zgjedhur të investoje këtë sezon jo vetem në përforcimin e skuadrës me emra të rëndësishem, por dhe në strukturë me afrimin dy trajnerëve të afirmuar që më parë kanë qënë dhe pjesë e Tiranës”.
“Bledar Devolli do të marrë drejtimin e Tiranës U19, Ahmataj drejtimin e Tiranës U17. Akademia këtë vit do të jetë një nga prioritetet e klubit ku do të investohet shumë në infrastrukturë dhe burime njerëzore. Hedhim poshtë kështu, të gjithë spekullimet në lidhje me zhvillimet e fundit në klubin bardheblu,”-thotë klubi në “Facebook”.
Ndërkohë, sikurse dihet, drejtori i Akademisë së Tiranës, është një emër i njohur i familjes bardheblu, mjeshtri Dejvi Muka, i cili ka marrë përsipër ristrukturimin e sistemit zinxhir të klubit të Tiranës.