Dy britanike, drejt kupës “së vogël”…
● Në gjysmëfinale do të përballen Arsenal-Valencia dhe Eintraht Frankfurt-Çelsi, ndeshje të cilat do të zhvillohen në 2 dhe 9 maj.
Arsenali, Çelsi, Valecia dhe Eintraht Frankfurt janë 4 ekipet e kualifikura në gjysmëfinalen e Europa League, pas ndeshjeve të kthimit pa shumë surpriza.
Arsenal fitoi edhe betejën e dytë ndaj Napolit, këtë herë 1-0, pas një goditjeje dënimi mjeshtërore nga Lakaset. Skuadra e Ançelotit, e pa fuqishme për të reaguar dhe ndryshuar rrjedhën e lojës.
Çelsi fitoi ndaj Sllavia së Pragës, në një lojë me shumë gola, por jo bindëse. “Blutë” e Londrës shënuan me Pedro Rodrigez (2), Zhiru dhe një autogol, ku kualifikimi ishte vendosur në Pragë. Çelsi fitoi me rezultatin 4-3.
Në “Mestaja” shënuan Lato dhe Guedes, që fiksuan fitoren 2-0 të Valencias ndaj Villarealit në “derbin” iberik. Kualifikimi ishte vendosur në të vajtjes.
Supriza e vetme e çerekfinaleve ndodhi në Frankfurt. Eintrahti vendës me fitoren 2-0 përmbysi rezultatin e portugezëve të Benfikës pas golave të Kostiç dhe Rode, që u shndërruan në heronjtë e mbrëmjes gjermane. Takimi i parë kishte përfunduar 4-2 për Bemnfikën.
Sipas skemës së përcaktuar më parë, në gjysmëfinale do të përballen Arsenal-Valencia dhe Eintraht Frankfurt-Çelsi, ndeshje të cilat do të zhvillohen në 2 dhe 9 maj.
Finalja e madhe e Europa League është programuar për t’u luajtur më 29 maj në stadiumin “Olimpik” në Baku të Azerbajxhanit.