Apeli i Laçit: Të gjithë në stadium!
Faza e katërt e Superiores për skuadrën e Laçit starton në shtëpi me sfidën ndaj Kukësi. Një ndeshje tepër e rëndësishme për të dy ekipet.
Kukësi renditet i dyti me 45 pikë, Laçi i katërti me 41 pikë. Në tri sfidat e mëparshme të këtij sezoni, në “fushën” e Kukësit janë arritur dy barazime 1-1 dhe 0-0, ndërkohë që kurbinasit kanë humbur 1-0 në Laç.
Të mërkurën e 10 prillit do të luhet “seria” e katërt e këtij filmi. Kurbinasve u duhet fitorja për të synuar Europën.
Për këtë arsye, ashtu si edhe ndaj Tiranës dhe Teutës, drejtuesit e klubit kurbinas kanë vendosur t’i hapin sërish dyert e stadiumit për tifozët e tyre.
Lajmi bëhet i ditur nga vetë faqja zyrtare e klubit kurbinas në Facebook që iu bën apel tifozëve të mbushin tribunat në këtë takim.
“Ditën e mërkurë me datë 10 Prill, ora 15:30 skuadra jonë përballet me Kukësin në një nga ndeshjet më te rëndësishme të këtij sezoni !
Seria e rezultateve pozitive duhet të vazhdojë dhe kjo arrihet me kontributin e të gjithëve. Prandaj, tifozë, ju bëjmë thirrje që të jemi së bashku në betejën e radhës. Djemtë do japin gjithçka në fushë. Objektivi është fitorja, për ju, për ne, për gjithë Kurbinin. Ftoni miq e të afërm, nuk duhet të ketë asnjë vend bosh në shkallët e stadiumit. Ashtu si në ndeshjet e fundit, hyrja në tribunën përballë dhe atë pas portës veriore do të jetë e lirë.
Ushtima e thirrjeve tuaja është domosdoshmëri, ndaj mos mungoni! Të gjithë në stadium në mbështetje te skuadrës tonë”, shkruhej në njoftimin e klubit kurbinas.
