Fundi i sezonit, Superiorja sot dy duele të ndezura
Do të startojë sot java e 33-të e Abissnet Superiore. Në program sipas kalendarit të Departametit të Garave dy takimet e orës 18:00. Skënderbeu- Erzeni dhe Dinamo Siti -Laçi të destinuara të luajnë fatet e tyre në Korçë dhe në “Elbasan Arena”.
Korçarët janë në kërkim të zonës ‘Final 4’ ndërsa rivali i tyre Erzeni me shansin e fundit për të gjetur shpëtimin e sezonit. Në kampin korçar nuk ka mungesa çka i jep mundësinë trajnerit Gvozdenoviç të zgjedhë formacionin më të mirë të mundëshëm.
Sakaq Deliallisi e di mirë se sot kjo sfidë merr permasat e finales për të mbajtur gjallë shpresat për qëndrim. Nga kampi i tyre Atanda dhe Marzuk nuk janë në listë.
Ndërkohë Dinamo do të presë Laçin në Elbasan. Kjo sfidë i ngjan një finaljeje tjetër pasi si blutë ashtu dhe bardhezinjtë e kanë të ndaluar të humbin. Skuadra e Mehmetit ka 46 pikë po aq sa Tirana të cilat duelojnë në distancë për zonën play off (Final Four), ndërsa kurbinasit për të ruajtur pozicionin e kërcënuar në tabelë nga skuadrat poshtë.
Te blutë mungesë e madhe ajo e mesfushorit Gudiabi por dhe Tahirit ndërsa te kurbinasit ato janë disa; Kryeziu,Kurti dhe Melo për kartonë, Paolo Zhunior i dëmtuar.
Sakaq të dielën dy ndeshje në orën 15:00 dhe derbi i madh i kryeqytetit Tirana- Partizani parashikuar për në orën 19:00.
Java e 33-të:
Sot:
18:00
Skënderbeu- Erzeni
Dinamo Siti -Laçi (në Elbasan)
Të dielën:
Egnatia- Vllaznia 15:00
Kukësi- Teuta 15:00
Tirana- Partizani 19:00 (në ‘Air Albania’)
