Partizani, festë për ditëlindje
Sot në Tiranë, mes shumë personalitetëve të klubit të Partizanit dhe të jetës sportive në vend, u zhvillua një takim në nder të ditëlindjes (së munguar) të 80-të të mjeshtrit të madh të topit, Panajot Pano.
Mes të pranishme dhe kreu i FSHF-së z. Armand Duka, ish-presidenti i Republikës, z. Bamir Topi, drejtori i klubit Partizani, z. Olsi Rama etj. Nga kasta e vjetër e shkollës së “kuqe”, në hollin e ish-hotel “Sheratonit”, u panë Sulejman Maliqati, Sabah Bizi, Astrit Ziu…
Nuk mund të mungonte në këtë datë-përvjetor, i biri i legjendës Pano, Ledio Pano dhe pjesëtarë të familjes së tij.
Prof. Përparim Kabo, në rolin e moderatorit, pas fjalës së tij hapëse kushtuar jetës së Panos, e kaloi më pas fjalën te disa prej të ftuarve specialë.
Njëri prej tyre, Shkëlqim Hajdari, përpos urimit për ditëlindjen e munguar të Panos, hodhi idenë se stadiumi i ri i projektuar, si “Arena Kombëtare”, të marrë emrin “Stadiumi Kombëtar, Panajot Pano”.
Pjesëtarë të akademisë së klubit Partizani, më tej shpërndanë për të pranishmit fanelën me numër 80. Simbolika, Pano 80 vjeç.
Në fund u shtrua një kokteil, ndërsa ish-futbollistë e drejtues, njerëz të mediave sportive, shkëmbyen ide e zhvilluan biseda, me temën e përbashkët “Panajot Pano”.
