Kukësi provim shtëpie, Partizani e nis ndaj Laçit
Partizani-Teuta e programuar për javën e parë e shtyrë, të kuqtë nisin sot nga ‘Arena e Demave’ ndaj bardhezinjëve të Bejzades.
Kukësi-Egnatia (16:00)
Java e dytë e Abissnet Superiore do të vijë sot me dy takimet e fundit të saj. Radha e Kukësit të Rrahman Hallaçit për t’u prezantuar para publikut të tij në ‘Kukës Arena” teksa në 16:00 pret Egnatian e Rrogozhinës.
Humbja në start me Vllazninë 3-1, nuk është se është pritur dhe aq keq te kampi verilindoar pasi në të vërtetë, skuadra e riformatuar ndjeshëm këtë sezon, arriti të shprehej goxha mirë. Sulmuesi Mustafa Gbolahan dhe të tjerë futbollistë të afruar, treguan aftësi për t’u admiruar.
Ndërkaq Egnatia edhe pse e mbushur me elementë cilësorë, humbi në takimin shtëpiak me Skënderbeun 0-1 duke dalë nga pritshmëritë e klubit dhe tifozerisë së saj. Largimi i Redi Kasës drejt Olimpija Ljubjanë vetëm 4 ditë më parë ka përzier kartat e linjës së djathtë me teknikun Tetova që lipset të përshtasë një tjetër lojtarë në këtë pozicion.
Partizani- Laçi (19:00)
Galopimi i suksesëshëm i Partizanit në Europë, u mbyll në fazën play off të Conference League ndërsa të enjten u eleminua nga Astana (1-2 rezultati i përgjithëshëm).
Për kampionët e Shqipërisë radha e debutimit në këtë edicion të 85-të futbollistik me misionin për të ruajtur kurorën e 17-të të arritur majin e kaluar. Tej problemeve me elementët e dëmtuar si Mba e Mehmeti, ‘Demat’ dukshëm të lodhur nga sfidat europiane, do luajnë ndaj kurbinasëve bardhezi që nga ana e tyre janë ende të “pa deshifrueshëm”.
Zhvillimet në merkato teksa skuadra vjen me elementë të rinj e së fundi largoi dhe Sebastjan Spahiun, por dhe debutimi i Skerdi Bejzades në stol, risi për t’u parë gjatë kësaj mbrëmjeje.
Java e dytë Abissnet Superiore:
Sot:
Kukësi-Egnatia
Partizani- Laçi
Luajtur të premten:
Erzeni- Vllaznia 2-2
Skënderbeu- Dinamo 1-0
Luajtur të shtunën:
Teuta-Tirana 2-2