Egnatia shkruan historinë, kap finalen e Kupës
Kupa e Shqipërisë, gjysmëfinale:
Egnatia – Vllaznia 1-0 (Xhekson 90′)
Sara Gjidiaj
Finalistja e parë e Kupës së Shqipërisë për të parën herë në histori është Egnatia. Rrogozhinasit eleminuan shkodranët në gjysmëfinale me gjithçka të vendosur në minutën e 90′-të të takimit, pikërisht atëherë kur kuqeblutë kishin shumë pak kohë të reagonin.
Pjesa e parë u shënjua nga dy episode. Që në minutën e tretë, Jorgji akordon të kuq për Çobën por VAR kundërshton duke shpëtuar Vllazninë. Sërish protagonistë Çoba dhe sistemi VAR i cili do të anulojë dhe një gol të sulmuesit për pozicion jashtë loje.
Në fraksionin e dytë Egantia shfaqet më rrezikshëm me Qarrin që bëhet disa herë shpëtimtar, por jo deri në fund të sfidës. Xhekson nuk fal më para portës së shkodranëve dhe i ben dhuratën më të bukur ekipit të tij, duke shënuar dhe duke ngritur në festë tifozët e pranishëm jashtë rrethimit të stadiumit.
Në minutat e mbetura, miqtë ishin të pafuqishëm të ndryshonin diçka dhe u pajtuan me një tjetër zhgënjim përballë rrogozhinasve. Kështu, për Vllazninë, fituese 2 herë radhazi e këtij trofeu në vitet e fundit, aventura përfundon këtu, ndërsa Egnatia ka shkruar tashmë historinë.