Superiore/ Adrenalina në majë, sot dy finale…nervash
E 31-ta e Abissnet Superiore do të startojë sot. Fillimisht në stadiumin “Adush Muça” me duelin epik Bylis- Laçi (15:00) ndërsa në 18:00 në “Niko Dovana” të Durësit takimi Erzeni- Partizani.
Java kompletohet të dielën teksa në radhë takimet: Kukësi- Teuta, Tirana- Kastrioti dhe Vllaznia- Egnatia.
Bylis- Laçi (15:00)
‘Finale’. Për skuadrën e Naxhi Shensoit rruga e vetme për të tentuar qëndrimin në elitë, mbetet fitorja. Kushtëzuar nga pikët (33, vendi i 9-të) dhe rezultatet në disfavor që mund të vijnë nga Kukësi (Kukësi- Teuta) apo Durrësi (Erzeni-Partizani) mallakastriotët e plotë në emra, sot, do duhet të triumfojnë ndaj bardhezinjëve të Stavri Nicës.
Nga ana e tyre laçianët janë në siklet për europën. Vetëm fitorja i mban gjallë shpresat e tyre për të përsëritur edicionet e fundit e justifikuar sezonin. Skuadra ka moral të lartë pasi në tri takimet e fundit ka marrë 2 fitore dhe një barazim. Rritja progresive e lojës me Guindo (me statusin e ishit sot), Shkurtaj, Spahiu, Ujka, klasin e Mazrekajt, japin garanci për një mbyllje pozitive sezonale të nënkampionëve në fuqi.
Erzeni-Partizani (18:00)
Edhe kjo përballje i ngjason finaleve të shumta. Shihni zbehjen e shijakasëve në 5 javët e fundit (3 humbje 2 barazime, 38 pikë) por dhe lëkundjet e Partizanit në betejen për titullin.
Në fakt, Erzeni ka vuajtur për disa kohë mungesa titullarësh ardhur kryesisht nga dëmtimet për t’u pasqyruar në rendimentin e pikëve. Sot sërish i arnuar pasi si kapiteni Krasniqi ashtu dhe mbrojtësi i majtë Ardit Peposhi janë të pezulluar nga kartonët.
Për skuadrën e Kolelës, e vetmja alternativë për të sfiduar kreun, rezulton fitorja. Në kampin e kuq, pas fitores së fundit ndaj Bylis (2-1) ndihen optimistë se kjo ndeshje do të konvertohet në tri pikë.
Mbi bazën e kontigjentit të plotë, trajneri italian i Partizanit pritet të operojë apo alternojë të tijtë në këtë 90′ minutësh deçiziv. Paçka se dje në konference shtypi e konsideroi rivalin e sotëm mjaft të rrezikshëm. Me Mba e Rrapaj në superformë, çështja “Hoti” (krisje me klubin), kalon në plan të dytë. “Demat” sot në versionin ‘sulmues’.
Abissnet Superiore, java e 31:
Sot:
Bylis- Laçi 15:00
Erzeni- Partizani 18:00 (në Durrës)
Të dielën:
15:00
Kukësi- Teuta
Tirana- Kastrioti (në Elbasan)
18:00
Vllaznia- Egnatia