Kukësi prezanton zyrtarisht Gyasin
Nëse mbrojtësi Bruno Lulaj zyrtarizoi largimin nga skuadra, sot Kukësi ka bërë zyrtare afrimin e lojtarit ganez me skedë të pasur sportive.
Tani mbetet të shihet se ku do ta vazhdojë karrierën Lulaj, të cilit nuk i kanë munguar ofertat.
Edvin Gyasi është prezantuar zyrtarisht si lojtari më i ri i skuadrës së Kukësit. 31-vjeçari që mbulon pozicionin e sulmuesit të krahut ka firmosur për 1 sezon me verilindorët.
Futbollisti nga Gana i lindur në Holandë, vjen te Kukësi nga kampionati izraelit, ku sezonin e fundit ka luajtur me Beitar Jerusalem.
I formuar tek Akademia e AZ Alkmar, sulmuesi ka qenë pjesë edhe e ekipeve si Tvente, Grafshaps, Roda, CSKA Sofia, Samsunspor dhe Boluspor. Gjithashtu në CV-në e tij janë edhe 5 paraqitje me kombëtaren e Ganës në 2017./S.Gjidiaj/
Njoftimi:
“Futboll Klub Kukesi njofton se sulmuesi i krahut Edvin Gyasi është zyrtarisht futbollist i skuadrës sonë! Futbollisti 31-vjeçar ka firmosur me klubin tonë për 1 sezon, duke u bërë kështu futbollisti më i ri në skuadër.
Gyasi vjen te Kukësi nga kampionati izraelit, duke qenë sezonin e fundit pjesë e skuadrës së Beitar Jeruzalem, teksa në të shkuarën ka luajtur edhe për ekipe si Grafshap, Herakles, Roda, Alesund, CSKA Sofje, Dallas, Samunspor e Boluspor.
Gyasi është një prodhim nga akademia e AZ Alkmar, teksa ka qenë edhe pjesë e ekipit të të rinjve të Tuentes. Në të shkuarën, Gyasi ka luajtur edhe me kombëtaren e Ganës”, shkruhej në njoftimin e Kukësit.