Seria A, sot kalendari dhe oraret …
● Më 20 qershor ristarton Seria A me ndeshjet e prapambetura të javës së 25. Sipas kërkesës së lojtarëve, vetëm 10 ndeshje janë planifikuar për t’u zhvilluar në orën 17:15
Sot, asambleja e Ligës së Serisë A do të zyrtarizojë kalendarin e ri të kampionatit, i cili do të rifillojë më 20 qershor, me ndeshjet e pezulluara të javës së 25-të. Projekt-kalendari parashikon që vetëm 10 ndeshje do të luhen në orë 17:15, ndërsa 114 takimet e tjera do të shpërndahen në orët 19:30 dhe 21:15.
Sakaq, është menduar që në Napoli, Kaljari dhe Leçe, të mos zhvillohet asnjë ndeshje në orën 17:15, për shkak të stinës së verës dhe temperaturave të larta në këto vende. Ndërkohë, kalendari i ri i Seria A, ka planifikuar që do të luhet çdo tri ditë për t’u mbyllur kampionati më 2 gusht. Më pas janë kupat europiane…
Seria A, do të rinisë me ndeshjet e prapambetura të javës së 25-të, sipas këtij kalendari: Torino-Parma (20 qershor, e shtunë, në orën 19:30), Verona-Kaljari (20 qershor, e shtunë, në orën 21:30), Atalanta-Sasuolo (21 qershor, e diel në orën 19:15) dhe Inter-Sampdoria (21 qershor, e diel, në orën 21:45).
Në asamblenë e sotme të pasdites, pritet që Liga Italiane të përcaktojë edhe kalendarin e ndeshjeve “big” të Serie A. Edhe pse për to ka një projekt, gjithçka pritet të zyrtarizohet pas kompromiseve midis personazheve në asamble.
