Vllaznia mban larg Partizanin, nga një pikë në supersfidën e javës
Abissnet Superiore, Java 30:
Partizani – Vllaznia 0-0
Ndeshja e fundit në program për ditën e sotme, supersfida Partizani – Vllaznia, luajtur për aktin e 30-të Abissnet Superiore, u mbyll në barazim pa gola.
Kryeqytetasit dhe shkodranët ndanë pikët në “Air Albania” duke ruajtur trendin e sfidave me rivalitet mes tyre.
Një duel thuajse i barabartë mes dy skuadrave të katërshes së parë me një dominim të lehtë të Partizanit që krijon, por e ka të vështirë të finalizojë. Skuka dhe Mba provojnë të rrezikojnë portën e Qarrit por vetëm kaq pasi gardiani kuqeblu nuk thehet.
Nga ana tjetër, miqtë provojnë me Grudën e Balajn por dhe për ta goli mbetet thjesht iluzion. Në këtë takim rastin më të mirë e pati Çoba (77′) teksa sfida po i afrohej fundit por sulmuesi nga 4 metra larg u ndal nga portieri Qirko. Në shtesë edhe të kuqtë patën një shans të mirë por që u zgjigj keq.
Kështu, mbyllet pa gola dueli mes skuadrave me përpjekjet e pamjaftueshme për të shënuar e festuar një fitore që për secilën mund të ishte një fitore sigurie.
Sa i përket klasifikimit, Vllaznia renditet e dyta me 51 pikë, 3 më pak se kryesuesit e Egantias që do të luajnë nesër ndaj Erzenit, ndërsa Partizani është një shkallë më poshtë me 48 pikë./Sara Gjidiaj/