Laçi rikthehet te fitorja, Teuta ndalet nga…shtylla
Abissnet Superiore, Java 30:
Teuta – Laçi 0-1 (Melo 71′)
Nga Sara Gjidiaj
Që prej 20 janarit pa fituar një ndeshje, Laçi rikthehet te 3-pikëshi mes peripecish përballë një kundërshtari direkt si Teuta në duelin e mbijetesës. Durrsakët dhurojnë spektakël, por laçjanët shijojnë fitoten.
Shumë zhurmë për asgjë në 45 minutat e para ku dy ekipet luftuan fort, por prodhuan shumë pak dhe nuk arritën asgjë. Më e qartë dhe më kërkuese Teuta në lojën e saj, ndërkohë që kurbinasit “trembën” pak herë Vatën.
Vijon me ritmin e së parës skuadra durraske edhe në pjesën e dytë, madje edhe më e vendosur për të gjetur golin, por një kundërsulm i bardhezinjve do të rezultojë fatal për vendasit. Melo nuk gabon përballë Vatës dhe shënon duke kaluar përpara të tijët.
Shumë përpjekje nga ana e Tetutës për të mos dalë pa pikë nga ky takim, por Dajsinani vendimtar i thotë “jo” disa herë skuadrës së Martinit duke i mohuar shijen e golit në këtë përballje.
Në klasifikim, tashmë skuadra e Cungut i lë vendin e ftohtë durrsakëve me 34 pikë, ndërkohë që vetë renditet e shtata me 35 të tilla. Lufta e mbijetesës duket mjaft interesante.