Sevilja trondit Junajtid, Roma spektakolare ndaj Fejnord
Përgatiti: Sara Gjidiaj
Janë luajtur këtë mbrëmje ndeshjet e dyta çerekfinale të Europa League me çiftet gjysmëfinaliste tashmë të kompletuara.
Roma hodhi poshtë sërish Fejnordin me Dibalën që vendosi të dërgonte duelin në shtesë duke i prishur festën holandezëve vetëm pak sekonda nga përfundimi i kohës së rregullt.
Në minutat 101′ dhe 109′ shënohen golat vendimtarë për fitoren e Romës së Murinjos me El Sharavin dhe Pelegrinin që presin biletën e italianëve për në gjysmëfinale.
Sakaq, Sevilja shkatërroi Mançester Junajtid duke e mposhtur 3-0 dhe duke i mohuar të drejtën e kalimit të doganës çerekfinale. Anglezët nuk mund të bënin asgjë më shumë në këtë sfidë e cila foli për të zotët e shtëpisë.
Bardhezinjtë e Juventus janë gjysmëfinalistët e tjerë të cilët edhe pse barazuan ndaj Sportingut të Lisbonës, sigurojnë biletën për më tej falë fitores minimale në sfidën e parë.
Kalojnë turin edhe gjermanët e Leverkusen pasi thyen barazimin e vajtjes me fitoren bindëse 1-4 ndaj Union St. Xhilozë.
Çiftet gjysmëfinaliste që ka rezervuar shorti do të përplasin Romën me Bajer Leverkusen dhe Juventus me spanjollët e Seviljes. Sfidat në program për më 11 dhe 18 maj.
Europa League, çerekfinale:
Sevilja – Mançester Junajtid 3-0 (5-2)
Sporting Lisbonë – Juventus 1-1 (1-2)
Roma – Fejnord 4-1 (4-2)
Union St. Xhilozë – Bajer Leverkusen 1-4 (2-5)
