Kryeredaktori i ‘përjetshëm’, ‘Mjeshtër i Madh’
Kryeredaktori dhe njëri nga drejtuesit më të lartë të ‘Sporti im.al’, gazetari i njohur Bashkim Tufa merr titullin ‘Mjeshtër i Madh’.
Nga: Isuf Myrtaj
Një ndër penat më të arrira, të gazetarisë sportive në Shqipëri, Bashkim Tufa, merr titullin e lartë “Mjeshtër i Madh’. Pikërisht në 2 korrik, në ditën ndërkombëtare të gazetarisë sportive, Presidenti i Republikës, zoti Ilir Meta, ka dekoruar me Titullin e lartë gazetarin, kryeredaktorin, analistin, ish-futbollistin i cili i kushtoi një jetë të tërë sportit.
Bashkim Tufa, profesionisti ‘numër 1’ i fushës teksa kurrë nuk bëri paqe me profesionin, vijon të jetë vital e aktiv duke përcjellë me një artikulim të shkëlqyer e profesionalizëm gjithëçka ngjet në fushat sportive në vend dhe në mbarë botën.
Vlerësimi për punën dhe kontributin e patjetërsueshëm përvijuar në mbi katër dekada, në thelb, përmban njohjen e meritave të punës thuajse gjysmëshekullore si gazetar, Kryeredaktor i ‘Sporti Shqiptar’, analist dhe opinionist në Radio Tirana dhe televizione të ndryshme të formatit sportiv.
“Ishte një titull, pjesë e të cilët janë edhe të gjithë kolegët dhe bashkëpunëtorët e mi, pa ndihmën e të cilëve, unë nuk do të isha ky që jam sot dhe nuk do të vlerësohesha me titullin e lartë “Mjeshtër i Madh”.Ju faleminderit të gjithëve, përulem me respekt para jush… “, shkruan Tufa në profilin e tij zyrtar në ‘Facebook’.
