Imeri rikthehet në Superiore, me Vllazninë
Ish-mesfushori i Shkëndijës së Tetovës, Demir Imeri, pas tri sezonesh rikthehet sërish në Superioren shqiptare. Aktualisht ai është futbollisti më i ri i Vllaznisë, fanelën e së cilës do ta veshë në sezonin e ardhshëm.
Pasi provoi të luante me sukses me skuadrën e Kamzës, pas përjashtimit të kamzalinjve, 24-vjeçari shqiptar nga Maqedonia e Veriut, provoi të luante në futbollin finlandez, pak në atë maltez, për ta mbyllur sezonin e shkuar te Olimpik Donjesk në Ukrainë.
“Një tjetër futbollist cilësor është bërë pjesë e KF Vllaznia nga mbrëmja e sotme. Drejtuesit e klubit kanë firmosur me mesfushorin e avancuar Demir Imeri. Pas përvojave me disa ekipe të tjera, Imeri tashmë është vënë nën urdhërat e stafit teknik të ekipit tonë dhe është një element më shumë në dispozicion të tij.
KF Vllaznia i uron mirëseardhjen këtij lojtari dhe njëkohësisht premton se në ditët në vijim do të ketë të tjera përforcime cilësore për skuadrën tonë”,- shkruhet në faqen zyrtare të klubit të Vllaznisë në “Facebook”.
