Edhe mesfushori Hyseni, pjesë e Dinamos
Dinamo, duket sikur këtë sezon e ka seriozisht. Lëvizjen e deritanishme nënkuptojnë përpjekje të drejtuesve të bluve të kryqytetit për të ndërtuar një skuadër ambicioze për sezonin e ri në Kategorinë e Parë.
Pasi kanë nënshkruar ditën e djeshme kontrata me dy futbollistë të Pogradecit, sulmuesin Ation Alillari dhe mesfushorin Kevin Berberi, klubi Dinamo njofton se ia ka arritur të bëjë të sajin edhe Klaudio Hyseni.
Mesfushori 26-vjeçar, sezonin e shkuar është aktivizuar në radhët e skuadrës së Tërbunit të Pukës, ndërkohë që më herët, ka qenë pjesë e Superiores në radhët e Skënderbeut të Korçës dhe Teutës së Durrësit.
“Klaudjo Hyseni që prej ditës së sotme është zyrtarisht lojtar i Dinamos.
Mesfushori 26-vjeçar i cili ka luajtur edhe në superiore me Skënderbeun e Teutën si dhe me disa ekipe në kategorinë e parë, ka zgjedhur Blutë dhe projektin e presidentit Pontrelli për vazhdimësinë e karrierës, duke hedhur edhe firmën mbi kontratën që e mban të lidhur për dy sezonet e ardhshme me fanellën dinamovite. FK Dinamo i uron mirëseardhjen dhe i uron suksese me fanellën e 18 herë kampionëve të Shqipërisë,”- shkruhet në njoftimin zyrtar të klubit Dinamo.
