S’ndalet Drita, 4 pikë më tepër se Prishtina
Me dy ndeshjet e sotme, u mbyll java e 28-të në Ipko Superligën e Kosovës.
Skuadra gjilanase e Dritës ka arritur të fitojë pastër 4-0 në transfertën ndaj Llapit, një skuadër që ka ditur t’i ndalë ‘të mëdhenjtë”. Pas autogolit të Pefqelit (8’), Rexha (14’), Vucaj (83’) dhe Emini (88’) kanë qenë autorët e golave për skuadrën Dritën, e cila pas këtij rezultati, vazhdon të kryesojë renditjen me 4 pikë më tepër se sa Prishtina.
Interesante ishte edhe sfida e mbijetesës midis Ferizajt dhe Trepçës ’89. “Minatorët” u “hakmorrët” ndaj vendësve dhe fituan 5-2, në një ndeshje ku nuk munguan tensionet. Halili (68’) dhe Bardhi (84’) u ndëshkuan me karton të kuq.
Pjesa e parë u mbyll 3-0 për miqtë, ku pas autogolit të Bardhit (18’), Muja (21’) dhe Manaj (33’), ishin autorë të golave. Në fraksionin e dytë të takimit Orana (61’) dhe Hajdareviç (74’) realizuan për Ferizajn, ndërkohë që Jashari me penallti (67’) dhe Ahmeti (90”+3) kompletuan fitoren 5-2 të Trepçës, që gjithsesi vazhdon luftën për mbijetesë.
