Duka “bekon” rifillimin e Superiores…
Presidenti i FSHF-së, Armand Duka, pak para rifillimit të Kampionatit të 81-të Kombëtar të Superiores, nëpërmjet faqes së tij private në Facebook, ka përshëndetur të gjithë futbollistët dhe tifozët për këtë ngjarje të shumëpritur në vendin tonë.
Teksa i uron suksese në këtë rrugëtim të gjithë, presidenti Duka u rikujton edhe një herë të gjithë protagonistëve të tregohen të kujdesshëm në zbatimin me rigorozitet të protokollit shëndetësor.
“Të dashur
futbollistë, tifozë dhe miq të futbollit!
Pas një periudhe të vështirë për të gjithë vendin, por edhe gjithë botën, për
shkak të pandemisë Covid-19 më në fund futbolli rikthehet sot me rifillimin e
kampionatit.
Kjo ndërprerje e menjëhershme e jetës sportive na ka dëmtuar, edhe
ekonomikisht, por sigurisht dëmi më i madh ka qenë ai sportiv. Futbollistët e
të gjitha niveleve, profesionistë, amatorë, fëmijët, nuk e kanë shumë të lehtë
që të kapin të njëjtën formë sportive. Ndërprerja patjetër që ka lënë shenjën e
saj dhe unë uroj ta kalojmë sa më parë, edhe pse jam i ndërgjegjshëm se nuk do
të jetë e lehtë.
Edhe një herë përfitoj nga rasti t’u kujtoj të gjithë futbollistëve, zyrtarëve
të klubeve dhe stafeve organizative që të jenë sa më të kujdesshëm e të
zbatojnë rregullat e distancimit social dhe protokollet shëndetësore në lidhje
me zhvillimin e ndeshjeve në këto kushte. Protokolle me të cilat të gjithë
aktorët dhe faktorët janë njohur tashmë.
Unë jam i bindur, që ju dhe stafet tuaja, do të tregoheni të kujdesshëm në këtë
drejtim, në mënyrë që gjithçka të shkojë sa më mirë.
Ndihem i keqardhur që ne nuk do të kemi mbështetjen e spektatorëve nëpër
stadiume. Uroj që shumë shpejt masat kufizuese të lehtësohen dhe tifozët të
kthehen në stadiume për të mbështetur skuadrat e tyre të zemrës.
Uroj nga zemra që kampionati të vazhdojë të na dhurojë sërish emocione, lojë të
bukur dhe Fair-play. Edhe një herë, urimet e mia më të mira për rifillimin e
kampionatit!
Suksese të gjithëve!”, shkruan Armand Duka, president i Federatës Shqiptare
të Futbollit.
