Moldavia, për Dukën detyrë shtëpie…

Presidenti i Federatës Shqiptare të Futbollit, Armand Duka u shpreh i kënaqur dhe i çliruar për fitoren e Kombëtares kuqezi mbrëmjen pas ndeshjes ndaj Moldavisë. Ai, në intervistën për Supersport, do të tregonte edhe për tensionin psikologjik që ka përjetuar para shënimit të golit.

I kënaqur me rezultatin dhe paraqitjet?
Kisha shumë presion deri në momenti në shënuam, aq sa në një moment humba edhe besimin, pasi nuk po rrezikonim. Megjithatë tani pas ndeshjes jam shumë i kënaqur, pasi shënuam dhe fituam.

A mund të themi që nis një epokë e re?
Kjo ndeshje ishte një detyrë shtëpie për Kombëtaren shqiptare, pasi edhe në letër jemi më lart se Moldavia dhe duhet të merrnim 3 pikët. Mendoj se kjo fitore do të përmirësojë atmosferën dhe klimën rreth ekipit, pasi vetëm kështu mund të bëjmë mirë dhe të shkojmë lart.

Tani jemi vetëm 3 pikë larg kreut, çka na rrit besimin për kualifikim?
Përpara kemi ndeshje shumë më të vështira dhe punë shumë të komplikuar, por çdo gjë mund të ndodhë. Në grupin tonë nuk ka pasur barazime, ndaj janë krijuar diferenca, por do të ngushtohen hapësirat dhe do të luajmë shanset tona.

Jeni i kënaqur për golin e Cikalleshit?
Jam i kënaqur që zhbllokoi ndeshjen, por edhe që shënoi ai vetë, pasi është një sulmues dhe golat do ta ndihmojnë. Shpresoj të vazhdojë mirë dhe të na dhurojë sa më shumë gola.