Kuqezinjtë pa numrin “1”, ftohet Selmani…
Thomas Strakosha humbet dy ndeshjet e Kombëtares me Islandën dhe Moldavinë, për shkak të një dëmtimi që nuk e lejon “gardianin” e Lacios që të jetë i gatshëm për të dhënë kontribut për kuqezinjtë.
24-vjeçari nuk u grumbullua nga Simone Inzaghi për ndeshjen e së hënës, Lacio-Bolonja, pikërisht për shkak të këtij dëmtimi që e mundon Strakoshën prej kohësh, raporton Supersport.
Aktivizimi në finalen Kupës së Italisë duket se e ka përkeqësuar gjendjen e portierit Strakosha, as sa të jetë e pamundur prania e tij me kuqezinjtë në dy ndeshjet e qershorit, në kuadër të eliminatoreve të “Euro 2020”.
Trajneri Edi Reja, për shkak të pamundësisë për të patur në dispozicion Strakoshën, ka ftuar në përbërje të Kombëtares portierin e skuadrës kurbinase të Laçit, Gentian Selmanin.
