Ajaksi kurorëzohet, 34 tituj të Holandës!
Pas katër vendeve të dyta radhazi, Ajaksi i Amsterdamit këtë sezon i dubloi sukseset. Pasi kishin “pronësuar” më herët kupën e Holandës, “harkëtarët” fituan edhe titullin kampion në Eredivisie, për herë të 34-t në historinë e tyre, një rekord absolut ky në Holandë.
Edhe pse titullin thuajse e kishin siguruar një javë më parë, skuadra e Ten Hagut bëri detyrën në transfertën ndaj De Grafshap, duke fituar 4-1 në javën e fundit të kampionatit. Ajaksi arriti 28 fitore në 34 javë, duke grumbulluar 86 pikë, tre më tepër se sa PSV Eindhoven i Van Bomelit, që i ndiqte nga pas.
Por shkëlqimi i Ajaksit, duket këtu përfundon. Nga grupi i “harkëtarëve” të Amsterdamit, pas mesfushorit De Jong, priten të largohen edhe futbollistë të tjerë si De Ligt, Van de Bek, Neres, Zijesh apo argjentinasi Tagliafiko, emra të lakuar në këtë fund sezoni.