Në Shkodër gati për festë, peng matematika
● Erzeni-Vllaznia 0-3 (Junior 76′, Tafili ’78, Zeqaj 90′). Me 12 pikë epërsi, Vllaznia ndiqet nga Besëlidhja në grupin A
Të dielën, skuadra shkodrane e Vllaznisë thuajse e siguroi edhe një “biletë” pjesëmarrjeje në kategorinë Superiore. Kur kanë mbetur edhe 5 javë për t’u zhvilluar, në kuadrin e javës së 22-të, shkodranët fituan 3-0 në transfertë ndaj Erzenit të Shijakut.
Të tri golat e ndeshjes u realizuan në fundin e takimit. Serinë e golave e hapi braziliani Zhunior në minutën e 76-të, për t’u pasuar edhe nga Tafili dy minuta më vonë, ndërkohë që Zeqaj në minutën e 90-të do të kompletonte fitoren 3-0 të Vllaznisë.
Ka mjaftuar ky rezultat, që skuadra shkodrane të hapë “shishet e shampanjës”, pasi për kuqeblutë e trajnerit Canaj, lezhjanët nuk përbëjnë ndonjë kërcënim serioz për ta.
Me 12 pikë përpara Besëlidhjes që e ndjek, tashmë Vllaznia thuajse e ka prerë “biletën” e pjesëmarrjes së Superiore sezonin e ardhshëm.
Ajo pret thjesht fituesin e grupit B, që me gjasa mund të jetë Bylisi, për të diskutuar midis tyre, çështjen e fitimit të titullit kampion në Kategorinë e Parë.