Sulmuesi Uzuni, imazh i “Nike”!
Karriera sportive e sulmuesit beratas Myrto Uzuni njeh vetëm rritje. Madje me një shpejtësi marramendëse. Një vit më parë luante në radhët e kurbinasve të Laçit.
Talenti i tij tërhoqi vëmendjen e kroatëve, të cilët e përfshinë në radhët e Lokomotivës të Zagrebit. Ndërkohë, Uzuni jo që u përfshi, por u bë edhe një prej titullarëve të Kombëtares, duke u dalluar për lojërat e tij.
Sot, personazhi ynë, sulmuesi kuqezi i kroatëve, Myrto Uzuni, mësohet të ketë nënshkruar edhe një kontratë marketingu me gjigandin e veshjeve sportive “Nike”.
Lajmin e bën të ditur menaxheri i futbollistit, Franci Bode, nëpërmjet një postimi në Instagram, nga ceremonia e nënshkrimit të kësaj kontrate bashkëpunimi.
“Myrto Uzuni është zyrtarisht atleti i Nike që nga ky moment. I lumtur të prezantoj sponsorin e tij të parë”. shkruhej në foton e menaxherit Bode.