Çudia/ La Liga do të luhet në SHBA

La Liga do të luhet edhe në Shtetet e Bashkuara të Amerikës. Jo menjëherë, as sezonin e ardhshëm, por ndoshta pas dy vitesh do të luhen disa ndeshje të kampionatit spanjoll në SHBA. Këtë e ka bërë të ditur Javier Tebas, presidenti i La Liga-s, duke folur për Expansion:

“Nuk e di kur, por këtë herë La Liga do të luajë ndeshje zyrtare jashtë vendit. Mendoj se mund të fillojmë nga sezoni 2025-26.

“Luajtja e ndeshjeve zyrtare në Shtetet e Bashkuara do të forcojë pozicionin tonë në tregun e Amerikës së Veriut, i cili është i dyti më i madh për La Liga pas atij spanjoll.

Kampionate të tjera shumë konkurruese po vendosen ngadalë, kështu që ne nuk mund të bëjmë gjithmonë të njëjtën gjë, ata do të na kalonin nëse nuk do të shkonim dhe të luanim disa nga ndeshjet tona të kampionatit atje.”

Numri një në kampionatin spanjoll u rikthye edhe në polemikat e El Clasico për golin fantazmë të anuluar ndaj Barcelonës përballë Realit në “Bernabeu”.

Pse nuk është futur teknologjia Goal-line në Spanjë?

Vetë Tebas e shpjegon: “Së pari nuk është një teknologji perfekte, por nuk është vetëm kaq. Gjatë një sezoni, golat fantazmë ndodhin tre ose katër herë, jo më shumë.

Mendoj se nuk ia vlen të investosh 5-6 milionë euro për të futur në dy divizionet e para të futbollit tonë për një ngjarje që ndodh kaq rrallë. Unë do të preferoja t’i shpenzoja këto para për të rritur numrin e kamerave dhe për të ndihmuar gjyqtarët.”