Kategoria e Tretë/ Hapen regjistrimet për edicionin e ri 2023-2024, ftohen klubet…
Federata Shqiptare e Futbollit në bashkëpunim me Shoqatën Rajonale të Futbollit Tiranë njofton të gjitha klubet dhe shoqatat e interesuara se kanë nisur regjistrimet për të qenë pjesë e edicionit të ri të Kategorisë së Tretë, për sezonin futbollistik 2023-2024.
Regjistrimet për këtë sezon futbollistik do të hapen më datë 1 gusht 2023 dhe do të mbyllen më 15 shtator 2023. Pas kësaj date asnjë kërkesë për t’u bërë pjesë e Kategorisë së Tretë nuk do të mund të merret në konsideratë. Kampionati i Kategorisë së Tretë pritet që të nisë edicionin e radhës në mesin e muajit tetor.
Klubet apo shoqatat e interesuara duhet të dorëzojnë në Federatën Shqiptare të Futbollit listën e dokumenteve të mëposhtme:
- Kërkesë nga Bashkia, klubi ose shoqata
- Dokumentin e pagesës prej 120.000 lekësh në Union Bank
- Fotokopje të pasaportës ose kartës së identitetit të Administratorit
- Kontroll mjekësor për çdo lojtar
- Listën emërore të ekipit. Të firmosur dhe vulosur nga klubi ose shoqata.
- Foto të secilit lojtar.
Për çdo pyetje apo sqarim që mund të keni në lidhje me Kategorinë e Tretë, ju mund të dërgoni një e-mail në [email protected]./FSHF/
