Gjasula mungesa e madhe e dy ndeshjeve të para kualifikuese të ‘Euro 2024’
E ndërsa me datë 5 qershor 2023, ora 12:00, në ambientet e Federatës Shqiptare të Futbollit, Salla e Konferencave, do të zhvillohet konferenca për shtyp e trajnerit të Kombëtares, Silvinjo, për të folur në lidhje me grumbullimin dhe listën e lojtarëve për dy ndeshjet zyrtare ndaj Moldavisë dhe Ishujve Faroe të vlefshme për Kampionatin Europian Gjermani 2024, një lajm i keq vjen nga top lista e tij për këto ndeshje kualifikuese.
Njoftimi i Departametit të Komunikimit në FSHF:
Mesfushori Klaus Gjasula nuk do të jetë i gatshëm për Kombëtaren dhe do të mungojë në dy ndeshjet e radhës ndaj Moldavisë dhe Ishujve Faroe, të vlefshme për kualifikueset e Euro 2024.
Departamenti i Komunikimit në FSHF bën me dije se futbollisti ka pësuar një dëmtim fizik dhe i është nënshtruar analizave mjekësore në ditët e fundit në bashkëpunim edhe me stafin mjekësor të Kombëtares.
Pas daljes së rezultateve dhe konsultave stafi mjekësor ka konkluduar se Gjasula nuk mund të jetë i gatshëm për dy ndeshjet e Shqipërisë dhe lojtari do të nisë ndërkohë fazën e rikuperimit pranë klubit të Darmstad.
Stafi teknik i Kombëtares ka komunikuar me mesfushorin dhe i ka uruar atij shërim të shpejtë në mënyrë që ai të rikthehet sa më parë në fushën e lojës./Sportiim.al/