Real magjik, katër gola Barcelonës, Junajtid rikthehet te fitorja
‘Los Blancos’ me një super Benzema (3) realizojnë poker në ‘Camp Nou’ për biletën e finales së Kupës së Mbretit.
Kjo e mërkurë ishte vërtetë spektakolare e sidomos në “Camp Nou” aty ku Real Madrid zhvilloi një ndeshje të çmendur duke përmbysur Barcelonën dhe duke prerë biletën e finales për Kupën e Mbretit.
Fitorja minimale e katalansve në sfidën e parë u harrua plotësisht falë triumfit të thellë të madrilenëve në shifrat 0-4. Në fillim Vinicius e më pas Benzema që shënon për të marrë topin në shtëpi, dërguan Realin drejt finales me Osasunën.
Gjithçka e bërë mirë nga madrilenët që u rikthye te fitorja në klasike pas disa humbjesh radhazi. Nuk munguan as momentet e tensionit gjatë kësaj përballjeje si dhe kartonat e verdhë të panumërt.
Sakaq, kampionati anglez (Premier League) zhvilloi dy takime ditën e sotme me Mançester Junajtid që i mori 3 pikë Brentfordit duke u ngjitur në vendin e katërt dhe Njukastëll që mposhti Uest Hem në shifrat 1-5.
Në Kupën e Italisë Fiorentina hodhi një hap drejt finales duke mposhtur 0-2 Kremonezen, teksa Shtutgart dhe Borusia Dortmund siguruan kualifikimin në Kupën e Gjermanisë.
Rezultatet:
Kupa e Mbretit:
Barcelona – Real Madrid 0-4 (1-4)
Premier League:
Mançester Junajtid – Brentford 1-0
Uest Hem – Njukastëll Junajtid 1-5
Kupa e Italisë:
Kremoneze – Fiorentina 0-2
Kupa e Gjermanisë:
Nuremberg – Shtutgarg 0-1
Lajpcig – Borusia Dortmund 2-0/Sara Gjidiaj/
