FSHF kalon kufirin, skaut në Preshevë
Të premten delegacioni i FSHF-së zbarkoi në Preshevë.
Përfaqësues të Federatës Shqiptare të Futbollit Sulejman Mema, Sulejman Demollari dhe zëdhënësi i zyrës për shtyp Fatjon Kodra, udhëtuan drejt Komunës së Preshevës me një mision special.
Të deleguarit e FSHF-së, Mema dhe Demollari kanë zyrtarizuar Nagip Jakupin, si përfaqësues dhe skaut i licençuar nga FSHF-ja, që të ofrojë talentet e këtij vendi për Kombëtaren kuqezi të Shqipërisë.
Në fund, delegacioni zyrtar i FSHF-së zhvilloi një vizitë edhe te kryetarja e re e Komunës së Preshevës, Ardita Sinani, të cilës i dhuruan edhe një fanellë të Kombëtares së Shqipërisë.
Sakaq, gjatë qëndrimit në Preshevë, delegacioni kuqezi, ndoqi dhe një ndeshje moshash ku panë nga afër cilësitë e lojtarëve të caktuar.
