Laçi hermetik në Baku, Cungu beson te kualifikimi
‘Jemi këtu për të luajtur kualifikimin’- ka thënë tekniku Cungu mes të tjerave.
U nis sot në mëngjes me destinacion Bakunë në Azerbajxhan. Bëhet fjalë për ekipin kurbinas të Laçit, i cili kryesohet nga zv/presidenti i klubit bardhezi Kleo Laska. Skuadra e teknikut Armando Cungu, do të luajë nesër në orën 19:00 (me orën e Shqipërisë), ndeshjen kualifikuese me Keshla të Bakusë.
Nisur nga situata pandemi globale, klubi bardhezi, me teste negative në ‘zarf’ dhe udhëtim me çarter, u desh të kalonte 3 orë e 15 minuta deri sa të prekte tokën azere.
Më pas axhenda. Akomodimi në hotel, dreka dhe çlodhja sipas një grafiku të detajuar e në kushte tejet disiplinore. Në orën 20:30 me orën vendase, trajneri Cungu u shfaq përpara gazetarëve vendas për t’ju përgjigjur pyetjeve.
Laçi nisi seancën përgatitore në orën 21:00, gjithnjë me orën azere dhe u lejua të ndiqet nga mediat vetëm në 15 minutat e para.
Pas përgatitores me dyer të mbyllura, i gjithë kampi bardhezi iu drejtua lokalit për darkën dhe në këto çaste është akomoduar në hotel për të kaluar natën.