Çelsi, bisedime me brazilianin Tiago Silva…
● Ish-kapiteni i Brazilit do të largohet nga Paris SG pas finales së Champions League.Qendërmbrojtësit Silva i është ofruar edhe marrëveshje dy-vjeçare nga Fiorentina.
Çelsi po mendon të nënshkruajë një kontratë me mbrojtësin brazilian Tiago Silvan, i cili do të marrë një vendim për të ardhmen e tij, pasi Paris SG të përballet të dielën me Bayern Mynih në finalen e Champions League.
Trajneri i bluve të Londrës, Frank Lampard është në gjueti për të përforcuar mbrojtjen dhe i ka ofruar mundësinë të nënshkruajë Silvas, kontrata e të cilit me Paris SG ka përfunduar. Ish-qendërmbrojtësi i Milanit ka zhvilluar bisedime për një marrëveshje me Çelsin, të cilët po peshojnë, nëse përvoja e gjerë e 35-vjeçarit do të përmirësonte lojën mbrojtëse të skuadrës londineze.
Tiago Silva, ish-kapiteni i Brazilit në Botërorin 2014, ka interes edhe për diku tjetër. Fiorentina i ka ofruar atij një marrëveshje dy-vjeçare. Ndërkohë te Çelsi ekziston mendimi nëse Silva, i cili mbush 36 vjeç muajin tjetër, do të jetë në gjendje të përballojë ritmin dhe intensitetin e Premier League në moshën e tij.
Megjithatë, propozimi është me interes për Çelsin, i cili pësoi 54 gola në Premier League, pavarësisht se përfundoi në vend të katërt sezonin e kaluar. Silva, i cili u bashkua me Paris SG, pasi u largua nga Milani më 2012, është një nga mbrojtësit më të mirë të brezit të tij dhe ka luajtur një rol kryesor në klubin francez, që ka arritur finalen e tij të parë në Champions League.
