Troisi: ‘Më mirë shtypni një robot…’
Flamurtari akuzon për gjykim plot gabime në takimin e Kupës së Shqipërisë në Vlorë kundër Vllaznisë duke aluduar se eleminimi në Kupë, ka ardhur jo nga fusha….
Gjykimi i ndeshjes Flamurtari- Vllaznia, iu besua ndërkombëtarit Enea Jorgji, i cili pas disa javëve pezullim, iu rikthye zanatit.
Sakaq, Marselo Troisi, tekniku i ‘shumëshetitur’ i vlonjatëve, duket në sintezë me klubin teksa në profilin e tij në ‘Facebook’, kërkon që të vendoset sa më shpejt VAR-i dhe në futbollin shqiptar.
E ka konsideruar një “shfaqje groteske” akordimin e penalltisë për Vllazninë në minutën e 27′ të ndeshjes për të cilin Flamurtari pretendon se ishte dhuratë, pasi futbollisti i shkodranëve u hodh qëllimisht para mbrojtësit të Flamurtarit për të vjedhur penallti.
Në fakt Flamurtari, u vodh edhe në sfidën e kaluar në kampionat me Partizanin ndërsa Solomon simuloi pastër dhe fitoi një top nga 11 metra larg.
“Nuk e kam mbështetur kurrë VAR-in, por pas asaj shfaqjeje groteske të arbitrave sot, pranoj 100% që të vendoset VAR-i. Më mirë shtypni një robot!”, shkruan tekniku brazilian.
Vllaznia fitoi me rezultatin 0-2 ndaj Flamurtarit duke siguruar kalimin në fazën çerekfinale të Kupës së Shqipërisë me rezultatin e përgjithshëm 4-2.
