Vllaznia, shtohet edhe me dy brazilianë…
Tri ditë para fillimit të Kampionatit të 81-të të Superiores, skuadra e Vllaznisë është plotësuar edhe me dy lojtarë të tjerë, të cilët janë vënë shpejt nën urdhërat e stafit teknik.
Mesditën e sotme kanë firmosur kontratat dhe janë prezantuar dy futbollistët brazilianë, Hygor Guimaraes Goncalves dhe Wenderson Da Silva Soares.
I pari, Hygor është 30 vjeç dhe ka një karrierë të gjatë, teksa në sezonin e fundit ka qenë pjesë e një skuadre në Liban. Ai luan në pozicionin e mesfushorit të qendrës.
Ndërkohë, Wenderson luan si sulmues dhe kryesisht ka luajtur në vendin e tij. Kontratat e këtyre futbollistëve janë deri në fundin e këtij sezoni, me të drejtë rinovimi edhe për një tjetër.
Ndërkohë, nga pasditja e sotme të dy lojtarët janë vënë në dispozicion të trajnerit maqedonas Mirsad Jonuz, duke zhvilluar edhe seancën e parë stërvitore.
KF Vllaznia i uron mirëseardhjen futbollistëve Hygor dhe Wenderson dhe shpreson, që së bashku të arrijnë objektivat e klubit, shkruhet në njoftimin e klubit shkodran.
