Shkëndija që nuk “ndez”
● Shkëndija e Tetovës, thyhet në shtëpi nga Nome Kalju 1-2 dhe eliminohet, në një kohë kur kualifikimi dukej punë e kryer…
Champions League: Shkëndija-Nome Kalju 1-2 (1-0) (Ibraimi 62′ (p)/ Uge 6′, Liliu 90+1)
Bie Shkëndija. Skuadra tetovare, përtej çdo parashikimi, është mundur në shtëpi nga Nome Kalju 1-2, duke dërguar në “ferr” gjithë mundin e takimit të pare (0-1).
Edhe pse tetovarët e Qatip Osmanit u gjendën në disavantazh (Uge 6’), goli i barazimit nga pika e bardhë me Ibraimin në të 62-tën, duket se i ka dhënë besim Shkëndijes për të administruar dhe kaluar në turin e dytë të Kupës së Kampioneve.
Në fakt, formacioni kuqezi iu afrua ndjeshëm golit të dytë, por në minutën e parë shtesë, pas një aksioni nga e djathta, Nome Kalju, realizon golin e nokautit.
Dështimi i Shkëndijes sjell pasoja ekonomike, ndërsa drejtuesit pritet të marrin edhe masa administrative. Ky ishte turpërimi më i madh i tetovarëve në dekadën e fundit gjatë pjesëmarrjes në kompeticionet europiane.
Gjithsesi, Shkëndija si kampione e Maqedonisë së Veriut, do t’i vazhdojë ndeshjet në turin e dytë të Europa League. Rivali i saj do të jetë skuadra humbëse e çiftit midis skuadrës luksemburgase, Dudelanzh dhe asaj malteze të Valetës.