Nisin problemet, Reja humb Memushajn…
Probleme që pasohen me ndryshime në listën e Kombëtares për dy ndeshjet zyrtare ndaj Islandës në transfertë më 8 qershor dhe Moldavisë në “Elbasan Arena” më 11 qershor, ora 20:45.
Me Mavraj të pezulluar për sifidën e pare, të tjerë futbollistë shqetësojnë radhët e ekipit të Rejas. Kështu, Egzon Binaku është dëmtuar në ekipin e tij IFK Norrkoping në ligën suedeze dhe në këto kushte, e ka të pamundur të bashkohet me kuqezinjtë.
Edhe mesfushori vlonjat Ledian Memushaj, i grumbulluar në kompleksin “Tropikal” ka shfaqur probleme fizike, duke e bërë të pamundur rikuperimin në kohë për dy përballjet.
Një tjetër futbollist që do të mungojë është edhe Marash Kumbulla, i cili për shkak të angazhimit me klubin e tij, Verona në Itali, do të bashkohet me U-21 më 3 qershor për transfertën e Turqisë.