Kombëtarja kuqezi e vajzave mund pastër Estoninë
Shqipëria e vajzave u tregua kompetitive në ndeshjen e dytë kualifikuese. Këtë mbrëmje ndaj Estonisë, e vlefshme për Kampionatin Europian “Zvicër 2025” të besuarat e Grimës dhuruan lojë plot emocione e siguri.
Skuadra e drejtuar nga trajneri Armir Grima humbi sfidën e parë me Luksemburgun 2-1 por sot vendosi zemrën në fushë teksa me nga një gol në secilën pjesë mundi 2-0 Estoninë në “Air Albania”
Ndonëse fillimi ishte jo fort i mirë, me kalimin e minutave skuadra kuqezi arriti të dominojë në fushë duke shënuar një gol të rregullt i cili u anulua padrejtësisht nga arbitret ukrainase. Sidoqoftë goli nuk vonoi teksa në të 31′ Fortesa Berisha goditi nga jashtë zone duke depozituar në rrjetë.
Në pjesën e dytë, Shqipëria ruajti avantazhin për ta dyfishuar në të 90+3 me Kristina Maksutin. Një fitore që mban gjallë shpresat për të dalë nga Grupi 5 i Ligës C, pjesë e të cilit figuron edhe Luksemburgu.
