Broja para Izraelit: Gati të marrin fitoren
Në prag të takimit të dytë të Ligës së Kombëve ndërsa Shqipëria do të presë në ‘Air Albania Stadium’, Izraelin të premten në 20:45, sot në konferencë shtypi u shfaqen Armando Broja dhe Myrto Uzuni.
Broja, i cili i është bashkuar Kombëtares në stërvitjen e djeshme konfirmoi gjendjen e mirë dhe është rikuperuar për sfidën e radhës të Shqipërisë ndaj Izraelit. Sulmuesi kuqezi u shpreh se skuadra kuqezi mund të bëjë më shumë, ndërsa dha edhe një mesazh për tifozët kuqezi.
Broja:
Gjendja fizike – Fizikisht jam mirë. Kam pasur COVID në përfundim të sezonit me Southampton, por tani jam rikuperuar. Kam bërë stërvitje të personalizuar në Angli këto ditë dhe jam mirë. Pardje erdha, bëra stërvitje me ekipin dje dhe jam mirë.
Sa do të ndryshojë skuadra me Brojën dhe Uzunin? – Se di, e bën trajneri ekipin. Unë e pashë ndeshjen nga jashtë dhe kemi luajtur mirë, por mundemi edhe më shumë si ekip. Kundër Izraelit do të jetë edhe më e vështirë, por unë mendoj se do bëjmë maksimumin dhe uroj të marrim 3 pikë.
Biseda me trajnerin Reja – Kemi folur me trajnerin kur erdha këtu dhe më pyeti se si jam fizikisht. Në fund të fundit, ai është trajneri dhe ai e zgjedh ekipin. Nëse më zgjedh, do bëj maksimumin, për pjesën tjetër do shohim.
Performanca në Angli me ekipin – Unë them se performancat e mia nuk ishin shumë të mira në përfundim të sezonit, po edhe si ekip kemi rënë pak. Nuk është justifikim, por jemi munduar të japim maksimumin.
Presion në futboll – Unë luaj më mirë kur jam titullar sepse kam më shumë minuta në fushë, por është vendim i trajnerit dhe duhet dëgjuar mendimi i tij. Nuk kam presion kur luaj futboll, jam i ri. Për mua futbolli është gjëja më e bukur për mua, kënaqem dhe jap maksimumin.
Mesazhi për tifozët – Falenderoj tifozët për mbështetjen dhe uroj t’ju shoh të gjithëve në ‘’Air Albania’’ kundër Izraelit.
E ardhmja – “Do të shohim për të ardhmen, tani jam te Çelsi. Jam duke biseduar me familjen dhe me agjentin tim.
Video:
