“Lojtarë për Kombëtaren, synimi parësor”

Trajneri i përfaqësueses U-21, Alban Bushi, sot ka zhvilluar një konferencë për shtyp, ku ka folur për ndeshjen ndaj Turqisë, ku u barazua 2-2 në Stamboll dhe dy ndeshjeve miqësore ndaj Uellsit, të fituara nga kuqezinjtë tanë 2-1 dhe 3-1.

Ai fillimisht i falenderoi dhe u shpreh i kënaqur me rezultatet e arritura, me nivelin dhe paraqitjen e futbollistëve, natyrisht pa anashkaluar problematikën e ekipit U-21.

Bushi foli mirë për Superioren, duke bërë apel që të rinjtë të aktivizohen më tepër në skuadrat tona, si një mundësi për rritjen e tyre cilësore. Jashtë vëmendjen ai nuk la edhe talentet që luajnë jashtë Shqipërisë, pa e fshehur faktin, se ata edhe mund të bëjnë në te ardhmen zgjedhjet e tyre.

Përgatitja e elementëve për Kombëtaren, është deviza e ekipit U-21, synim të cilin trajneri Bushi e theksoi me force gjatë gjithë konferencës për shtyp.

Rezultatet e fundit – “Jam i kënaqur me rezultatet, por mbi të gjitha nga impenjimi i grupit, sepse sakrifikuan në një fund sezoni të lodhshëm. Shumë lojtarë ishin të rinj, që nuk janë takuar me shumë shokë ekipi, por kanë punuar shumë mirë dhe rezultatet të japin kënaqësi.

Sulmi – “Ne jemi përqendruar më shumë në aspektin mbrojtës, duke tentuar kundërsulmin, pas eksperiencës së vjetshme, ku sulmonim shumë dhe pësonim shumë gola nga mungesa e eksperiencës. Kjo na detyron të punojmë shumë në aspektin mbrojtës, për të menduar më shumë për rezultatet. Golat që pësojmë janë për gabime naive, për dhurata, ndërsa vuajmë shumë për të gjetur golin. Këtu duhet të ndryshojmë.

Mbrojtja – “Golat e pësuar më lehtësi janë shqetësim, natyrisht. Lojtarët kanë nevojë të luajnë rregullisht në klubet përkatëse, u duhet të rriten dhe të fitojnë besim te vetja.

Kosova triumfoi në Andorrë, aty ku lamë pikë – “E kam parë atë ndeshje, por nuk më interesojnë rivalët dhe renditja. Ne u ndalëm në Andorrë, patëm probleme edhe me fushën, tani mendojmë për ndeshjen e radhës kundër Austrisë. Rëndësi ka të luajmë mirë, të mos pësojmë gola naiv. Ne punojmë për të çuar lojtarë në ekipin e parë, ky është synimi madhor.

Frika e rasteve si Durmishaj – “Unë aktivizoj lojtarët më në formë, Bullari është shqiptar dhe nuk ka arsye pse të shkojë te Greqia, por janë zgjedhje personale dhe nuk ndalojmë dot askënd. Kam biseduar me Bullarin, do të jetë për shumë kohë në kombëtare, por është ende shumë i ri, ka kohë për të menduar për ekipin A.

Superiorja prodhon – “Jam shumë i kënaqur nga lojtarët e kampionatit shqiptar, kanë bërë të pamundurën dhe kanë qenë ndër më të mirët, sidomos në Turqi. Kam grumbulluar shumë lojtarë nga kampionati shqiptar, por aq janë mundësitë, disa klube nuk i aktivizojnë të rinjtë. Nuk mund të grumbulloj lojtarë pa fund, do të detyrohem të bëj zgjedhje për ndeshjet e ardhshme.

Talentet e sulmit – “Broja e Bullari, mund të debutojnë në kombëtaren A? Është diçka e mirë që po paraqiten mirë, nëse vlejnë për ekipin A jam i lumtur, por janë të vegjël për të luajtur për ekipin A, edhe pse mund të grumbullohen ndonjëherë për eksperiencë. Janë ende tepër të brishtë për t’u ndeshur me lojtarë të mëdhenj të futbollit botëror.

Kosova dhe sjellja me të rinjtë – “Ne luftojmë me zemër, në ndeshjen me Turqinë djemtë dhanë gjithçka, edhe pse përballë kishim një rival superior në shumë drejtime, duke parë ekipet ku luajnë lojtarët turq”.