Dinamo sfida në Kukës, Tirana sheh klimën në Korçë, Teuta në kërkim të “çelsit” ndaj Laçit
Java e 12-të Abissnet Superiore nisi dje me Erzeni-Egnatia 0-1 në duelin rajonal të zhvilluar pa tifozë (dënuar klubi shijakas nga Disiplina) në “Arenën e Demave” në Tiranë.
Ndërkohë sot 6 skuadra në tre ndeshje të tjera. Do të nisë Kukësi i cili pret në “Kukës Arena” blutë e Dinamo Sitit me sfidën që starton në orën 13:30.
Kukësi- Dinamo:
Nica sërish do të jetë i kondicionaur nga mungesa të shumta ndërsa veç Momoh, Mbarak e Hasaj me shumë mundësi nuk do mund të ketë sherbimet e qëndërmbrojtësit Franci Lala i cili u dëmtua në seancat e fundit përgatitore. Rikthehet Endri Reçi.
Te Dinamo e teknikut Mehmeti situata është thuajse e njejtë me rivalin verilindor. Me Patrik Bardhin në dyshim (dëmtuar në Kupë ndaj Ilirisë në Arbanë), Gudiabin e skualifikuar tre ndeshje (ka ezauruar një ndeshje) por dhe Smaçin e Andonin në mesfushë, pritet të jetë sërish e arnuar.
Teuta-Laçi:
Durraskët e Martinit vijnë në këtë ndeshje pas dy humbjeve radhazi dhe sot në “Niko Dovana” do bëjnë gjithëçka për të kaluar kurbinasit me të cilët ka humbur radhazi 4 ndeshje të edicionit të kaluar dhe atë të fazës së parë (6-1) në Laç. Ka dilema për kondicionin e Filit dhe të riut Arifi ndërsa kthehet pas pezullimit qëndërmbrojtësi Artan Jazxhi.
Te bardhezinjtë e Josës, Ledio Tresa ende nuk është gati. Pjesa tjetër vjen pa probleme. Parë tre ndeshjet e fundit të tyre (një pikë) humbja e fundit në shtesë me Partizanin duket se ka prishur disi planet e laçianëve pasi tani vendi i 4-ët mbetet i kërcënuar nga disa skuadra. Josa me të tijtë, pritet të kërkojnë fitoren për të ruajtur trendin me durrsakët por rritur edhe në pikë.
Skënderbeu- Tirana:
Ka katër javë që Skënderbeu është përfshirë në rënje të lirë. Tre humbje dhe vetëm një barazim me Egnatian, e kanë rënduar poziten e korçarëve dhe të vetë trajnerit Ivan Gvozdenoviç.
Nga ana tjetër Tirana e Ahmatajt. Bardheblutë ia dolën të lënë pas situatën e rënduar me disa sfida negative teksa fituan javën e 11-të me Teutën 2-0.
Gjithësesi trajneri i Tiranës ka deklaruar para ndeshjes me korçarët se mungesat nuk po i ndahen duke bërë që skuadra të formatohet javë pas jave. Dy portierët Selmani dhe Abdullahu, mbrojtësi Lulaj, i zakonëshmi Patrik Robson por së fundi dhe Liridon Latifi të listuarit jashtë.
Java e 12-të Abissnet Superiore:
Sot:
Kukësi- Dinamo 13:30
Teuta- Laçi 17:00
Skënderbeu- Tirana 17:00
Të hënën:
Partizani- Vllaznia 18:00)
Erzeni- Egnatia 0-1(luajtur të shtunën) /Sportiim.al/
