Bylis fundos Kastriotin dhe futet në valle për qëndrim

Abissnet Superiore, Java 28:
Kastrioti – Bylis 0-2 (Kaçorri 17′, Santos 37′ pen)

Ndeshja e prapambetur e javës së 28-të Abissnet Superiore midis Kastriotit dhe Bylisit u zhvillua ditën e sotme në “Elbasan Arena”. Fitorja shkoi për ballshiotët, teksa krutanët prekin fundin.

Sfida nisi me malore për Kastriotin i cili u detyrua të luante me një lojtar më pak që prej minutës së shtatë. Kodra u ndëshkua me të kuq pas ndërhyrjes së ashpër ndaj Zguros.

Përfitojnë miqtë nga ndëshkimi i krutanëve dhe gjejnë golin e parë me Kaçorrin në minutën e 17′-të teksa për dyfishimin do të firmosë Santos nga 11 metra distancë.

Gjithçka vendoset gjatë pjesës së parë me sfidën që mbyllet me fitoren e Bylisit. Pavarësisht se në disavantazh numerik, Kastrioti nuk lejoi diferenca të dukshme në fushën e lojës edhe pse krutanët e patën të pamundur të realizonin.

Me këtë përballje direkte të fituar Bylis shkon në kuotën e 33 pikëve në vendin e nëntë, ndërsa për skuadrën e Çelës vendi i fundit është kthyer tashmë në normalitet, por situata ndërlikohet akoma më shumë pas kësaj humbjeje. Distanca ka shkuar në pesë pikë ndërmjet tyre.