Erzeni befason Vllazninë, Alan Rodrigues perla e premierës
Abissnet Superiore: Erzeni-Vllaznia 1-0 (Alan Rodrigues 22′)
Erzeni u rikthye në Superiore pas 19 vitesh mungesë në mënyrën më të mirë të mundshme. Shijakasit surprizuan në start duke mposhtur minimalisht favoritët e Vllaznisë në “Niko Dovana”.
Që në minutat e para Erzeni u shafq më kërkues duke penguar shkodranët të bëjnë lojën e tyre. Skuadra shijakase u gjend disa herë në zonën e Vllaznisë derisa në minutën e 22′-të erdhi goli vendimtar i sfidës.
Alan shfrytëzoi në maksimum një goditje dënimi nga një distancë e konsiderueshme duke mposhtur portierin Zogoviç dhe duke ndalur topin në rrjetë. Përveç golit të shënuar, braziliani ishte dhe një nga më të dalluarit në fushë për Erzenin.
Vllaznia u duk në “gjumë” përgjatë pjesës së parë ndërsa me startin e aktit të dytë, loja e shkodranëve ndryshoi. Kuqeblutë sulmuan më shumë por pa arritur të thyejnë shijakasit që treguan se kanë kualitet edhe në prapavijë.
Skuadra e teknikut Josa zhgënjeu në start duke nxjerrë në pah shumë mangësi, ndërsa Erzeni, i formuar me jo pak vështirësi dhe me vetëm 5 lojtarë në stolin e rezervave, tregoi se dhe një ekip i vogël me ambicie të mëdha mund të bëjë shumë. Mbetet për t’u parë në vazhdimësi ecuria e dy skuadrave./ S. Gjidiaj/
