Shqipëria nuk di të ngrihet, Uzuni po

• Kuqezinjtë shfaqen një skuadër në hije. Gafa e Hysajt u pasua nga ajo e Mihajt për dy golat e Izraelit. Goli i Uzunit? Erdhi nga një planet tjetër…

Tjetër humbje zhgënjyese për Shqipërinë në Nations League. Izraeli feston kalimin në Ligën A, kuqezinjtë shuajnë ëndrrat.

Një pjesë e parë me ritëm e me raste nga të dyja frontet, por e mbyllur me rrjeta të paprekura. Disi më insistues Izraeli dhe më dominues në mbajtjen e topit, ndërsa Shqipëria “qan” 2 rastet e humbura nga Broja. Sulmuesi kuqezi pati 2 mundësi të arta shënimi por nuk ia doli të finalizonte në momentin e fundit.

45-minutat e dyta nisin me gol. Vaisman përfiton në maksimum nga pasiguria e Hysajt në mbrojtje duke lënë një top në këmbët e vendasëve ndërsa sulmuesi e dërgon në rrjetë kur luhej e 46’ta. Pas pësimit të golit, duhen minuta që Shqipëria të kalojë atë goditje dhe të rikthehet të sulmojë. Rasti më i mirë ishte për Ramadanin por Glazer bëri heroin duke shpëtuar Izraelin nga pësimi i golit të barazimit.

E nëse Glazer arriti të ndalte Ramadanin, predha e Uzunit në minutën e 88′-të ishte e paarritshme për portierin izraelit. Vetëm pak minuta në fushën e lojës iu deshën sulmuesit beratas të shënonte një supergol për të barazuar shifrat e për të kthyer shpresat e fitores te kuqezinjtë.

Por e kundërta ndodh pasi në momentin më të mirë Shqipëria pëson sërish nga një gabim në mbrojtje. Mihaj “dhuron” golin e kualifikimit për Izraelin duke mbyllur përdundimisht çështjen e kreut të Grupit 2 të Ligës B.

Humbje pësoi edhe kombëtarja e Kosovës me përmbysje nga Irlanda e Veriut. Goli i Muriqit nuk mjaftoi për t’i dhënë 3 pikë skuadrës së Alan Zhires.

Sakaq në ndeshjet e tjera të Nations League, Portugalia mposhti Çekinë, ndërsa Zvicra surprizoi Spanjën duke e mundur në shtëpi. Vendi i parë në Grupin 2 të Ligës A diskutohet pikërisht mes Portugalisë dhe Spanjës në ndeshjen “finale”. Fiton edhe Serbia ndaj Suedisë, teksa Qipro surprizon Greqinë duke i martë një fitore në shifrat 1-0.

Rezultatet:

Liga A, Grupi 2:
Republikë Çeke – Portugali 0-4
Spanjë – Zvicër 1-2

Liga B, Grupi 1:
Armeni – Ukrainë 0-5
Skoci – Irlandë 2-1
Grupi 2:
Izrael – Shqipëri 2-1

Liga B , Grupi 4:
Slloveni – Norvegji 2-1
Serbi – Suedi 4-1

Liga C, Grupi 2:
Irlandë e Veriut – Kosovë 2-1
Qipro – Greqi 1-0/Sara Gjidiaj/