Kukësi firmos me një brazilian
Braziliani Vitor Feijao Correia da Silva, është përforcimi i radhës i Kukësit në Kategorinë Superiore.
Klubi njofton në rrjete se ka arritur të nënshkruajë për 2 vite me 24-vjeçarin, i cili ka provuar të luajë edhe në Serie A braziliane me Parana.
Me Criciuma, gjatë 2018-ës në Serie B, ai ka shënuar 6 gola. Treguesit teknikë, i japin të drejtë kuksianëve të besojnë se kanë goditur në shenjë.
Njoftimi:
“Futboll Klub Kukësi njofton se sulmuesi brazilian Vitor Feijao Correia da Silva është zyrtarisht futbollist i skuadrës sonë! Futbollisti 24-vjeçar ka firmosur ditën e sotme me klubin një kontrate dy vjeçare duke u bere kështu futbollisti me i ri në skuadër.
Feijao vjen te Kukësi nga kampionati brazilian ku sezonin e fundit ka qenë pjese e skuadrës së Boavistas.
Futbollisti 24 vjeçar ka luajtur në një ekip me ish-futbollistin tonë, Erick Flores i cili ka qenë një shtysë për futbollistin për të firmosur me Kukësin.
Klubi i Kukësit i uron shumë suksese sulmuesit Feijao me fanellën e ekipit tonë”, njofton klubi i Kukësit, që gjatë kësaj vere ka bërë një numër të konsiderueshëm përforcimesh.