FSHF, për një ditë epiqendër e futbollit ‘Europian’
Në përfundim të prononcimit të katër presidentët shkëmbyen fanellat e kombëtareve respektive në shenjë simbolike për këtë vizitë
Presidenti i Federatës Italiane të Futbollit, Gabriele Gravina, Presidenti i Federatës së Futbollit të Kosovës, Agim Ademi dhe Presidenti i Federatës së Futbollit të Maqedonisë së Veriut, Muamed Sejdini zhvilluan sot një vizitë në “Shtëpinë e Futbollit”.
Të tre presidentët u pritën në takim nga drejtuesit e Federatës Shqiptare të Futbollit e më konkretisht nga Presidenti Duka, Sekretari i Përgjithshëm, Ilir Shulku dhe nga anëtarët e Komitetit Ekzekutiv të FSHF-së. Miqtë vizituan ambientet e Shtëpisë së Futbollit, ku u njohën nga afër me investimet e kryera deri më tani dhe për ecurinë e projektit.
Presidenti i Federatës Shqiptare të Futbollit, Armand Duka, duke folur në prononcimin e rastit për mediat, përshëndeti vizitën e tre homologëve në Shqipëri, teksa i falenderoi në emër të të gjithë shqiptarëve për humanizmin dhe solidaritetin e treguar prej tyre pas tërmetit të 26 nëntorit 2019 përmes donacioneve dhe kontributeve për rindërtimin e disa shtëpive të dëmtuara nga fatkeqësia natyrore.
“Jam i kënaqur që kemi sot këtu me ne Presidentin e Federatës Italiane, z. Gravina, Presidentin e Federatës së Maqedonisë së Veriut, z. Sejdini dhe presidentin e Federatës së Kosovës, z. Ademi. Në radhë të parë dua t’i uroj mirëseardhjen, t’i falënderoj dhe në të njëjtën kohë t’i shpreh, jo vetëm mirënjohjen time dhe të komunitetit të futbollit, por mirënjohjen e të gjithë shqiptarëve për solidaritetin e tyre në një moment tonin shumë të vështirë, siç ishte tërmeti i nëntorit 2019.
I gjithë globi ka kaluar një periudhë të vështirë pandemike, por ne kaluam një tjetër ngjarje akoma më të vështirë mbase, tërmetin e nëntorit 2019 dhe presidenti Gravina ishte nga të parët që më ka telefonuar që në ditën e parë, për të më pyetur për dëmet, çfarë nevojash kishim, me çfarë mund të na ndihmonte dhe i është bashkuar iniciativës së Federatës së Futbollit për ndërtimin e disa shtëpive, me një fond të krijuar nga ne. Këtij fondi i janë përgjigjur edhe Federata të tjera, si Federata Spanjolle, Federata Islandeze, Federata e Irlandës së Veriut dhe kryesisht vëllezërit tanë nga Kosova dhe Maqedonia e Veriut dhe kemi ndërtuar këto shtëpi”, – u shpreh Presidenti Duka.
Më tej, kreu i qeverisë së futbollit shqiptar tregoi arsyen e ardhjes së tre presidentëve në Shqipëri dhe përgëzoi presidentin Gravina, i cili sapo është rizgjedhur në krye të Federatës Italiane të Futbollit.
“Arsyeja e kësaj vizite është që ne të vizitojmë shtëpitë, që janë në kantier ndërtimi dhe një nga shtëpitë e përfunduara. Dua të uroj Presidentin Gravina, sepse është i porsazgjedhur në krye të Federatës Italiane dhe t’i urojmë suksese atij dhe futbollit italian në të ardhmen dhe t’i urojmë shëndet të plotë në këtë kohë pandemike, biznes të mbarë, sepse është një nga biznesmenët më në zë apo më të rëndësishëm në Itali.
Mund t’ju them edhe një fakt tjetër, që 40% e punonjësve të kompanisë së presidentit Gravina janë shqiptarë. Edhe ky është një solidaritet tjetër, një shenjë miqësie apo afërsie me ne. Edhe një herë do të doja t’i falënderoja të gjithë, Presidentin Gravina, të gjithë ata që na kanë ndihmuar, futbollistët e ekipit Kombëtar, trajnerin Reja që ka qenë një donator i rëndësishëm, administratën e Federatës së Futbollit, presidentin Sejdini dhe presidentin Agim Ademi. Faleminderit!”, – tha Presidenti Duka.
Ndërsa, Presidenti i Federatës Italiane, Gabriele Gravina, falënderoi homologun shqiptar për mikpritjen e shkëlqyer dhe theksoi se futbolli ka një gjuhë universale, që rrëzon çdo barrierë dhe bashkon popujt. Z. Gravina vlerësoi marrëdhëniet e shkëlqyera mes federatave të katër vendeve dhe tha se është shumë e rëndësishme që përmes futbollit të jetojmë emocionet që i bëjnë edhe më të forta ndjenjat mes popujve.
“Dua të falënderoj Presidentin Duka për këtë mikpritje të shkëlqyer. Futbolli ka një gjuhë unike, një gjuhë universale. Rrëzon çdo barrierë dhe bashkon popujt. Në këtë rast specifik miqësia që më lidh me z. Duka është një shenjë e qartë se futbolli ka një dimension të shkëlqyeshëm marrëdhëniesh. Sot së bashku me miqtë tanë të Kosovës dhe Maqedonisë së Veriut përfaqësojmë të katër thuajse 8% të kampionatit të futbollit europian.
Kjo tregon se sa e rëndësishme është të qëndrojmë bashkë, sa e rëndësishme është që përmes futbollit të jetojmë emocionet që i bëjnë edhe më të forta ndjenjat mes popujve. Me Shqipërinë ne jetojmë një marrëdhënie ku ndajmë shumë projekte të futbollit në vendet tona, por edhe në nivel europian”, – tha kreu i Federatës Italiane të Futbollit, duke u ndalur më pas edhe te solidariteti i treguar në rastin e tërmetit të nëntorit 2019.
“Kur ka një moment vështirësie të madhe siç kemi përjetuar ne në Itali në vitin 2009, siç ka përjetuar Shqipëria në vitin 2019 mendoj se popujt bashkohen dhe i përballojnë nevojat së bashku me vëllezërit dhe miqtë e tyre. E kam vlerësuar shumë disponibilitetin e Shqipërisë dhe të Presidentit Duka për të krijuar këtë moment për t’u takuar me miqtë e Kosovës dhe Maqedonisë së Veriut sepse së bashku kemi zbuluar se jemi të apasionuar pas futbollit, por mbi të gjitha jemi miq. Në pak kohë takohemi, në pak kohë arrijmë të ndajmë ato që janë vlerat e vërteta të sportit. Kjo është forca e madhe e sportit, kjo është forca më e madhe e futbollit.
Për këtë dua të falënderoj presidentët, falënderoj ju të gjithë për disponibilitetin dhe mikpritjen dhe më lejoni të them rroftë futbolli, rroftë Shqipëria, rroftë Italia, rroftë Kosova dhe rroftë Maqedonia e Veriut!”, – u shpreh z. Gravina.
I pyetur nga gazetarët nëse kjo vizitë ka lidhje edhe me kandidimin e tij për postin e anëtarit të Komitetit Ekzekutiv të UEFA-s, presidenti i Federatës Italiane deklaroi: “Jo, sot nuk duam të merremi me politikë. Mund të flisnim edhe në telefon për këtë çështje. Prezenca ime këtu është një formë respekti për z. Duka, sepse e meriton e sepse bashkëndajmë një rrugëtim të rëndësishëm, por mbi të gjitha sepse unë besoj që Italia, Shqipëria dhe futbolli duhet të zbulojnë edhe kuptimin e të qenit së bashku. Nuk mund të humbasim ato që janë momentet e ekzaltimit të sportit tonë, duke jetuar vetëm kompeticionet sportive. Kemi nevojë të takohemi nga afër. Kemi qëndruar bashkë mbrëmë në një atmosferë të shkëlqyer, sot do të kalojmë një tjetër ditë bashku dhe më lejoni të them se kjo është forca e ndjenjës së madhe që na bashkon”.
Pyetjes se çfarë do të bëhet me futbollistët e rinj shqiptarë, të cilët aktivizohen në Itali e që kanë probleme me dokumentacionet, z. Gravina iu përgjigj: “Është një problem i vërtetë, për fat të keq burokracia është një nga elementët që bllokon mundësitë për të luajtur për shumë të rinj. Komuniteti më i rëndësishëm në Itali që praktikojnë sportin, është ai shqiptar. Janë rreth 14 mijë futbollistët shqiptarë që luajnë për klube italiane dhe duhet të përshpejtuar ky proces. Unë uroj që me qeverinë italiane të mund të gjenden modalitetet e duhura për të përshpejtuar hapat”.
Ndërsa sa i përket mundësisë për të organizuar një miqësore mes Shqipërisë dhe Italisë në të ardhmen e afërt, z. Gravina u shpreh se dëshira është e madhe, por kalendari i ndeshjeve ndërkombëtare të UEFA-s nuk lë hapësira për momentin.
“Do të kisha shumë dëshirë të bëhej, ne kemi dy ndeshje mes ekipeve kombëtare të moshës U-19 në muajin gusht. Për fat të keq kalendari i ndeshjeve ndërkombëtare na impenjon që të dyja vendet në garat zyrtare. UEFA i ka organizuar tashmë kampionatet zyrtare, por po përpiqemi të përdorim kompeticionet e moshave për të gjetur një mundësi për t’u ndeshur në fushë”, – deklaroi ndër të tjera Presidenti i Federatës Italiane të Futbollit, Gabriele Gravina.
Në përfundim të prononcimit të katër presidentët shkëmbyen fanellat e kombëtareve respektive në shenjë simbolike për këtë vizitë. (FSHF)
